Giingong nasurpresa si dismissed Bamban Tarlac Mayor Alice Guo dihang una niyang nasaksihan ang sitwasyon sa selda diin siya gibutang sa Pasig City Jail Female Dormitory, matod sa Bureau of Jail Management and Penology (BJMP).
Matud pa ni Jsupt. Jayrex Bustinera, tigpamaba sa BJMP, gawas niini, wala silay nadawat nga negatibong taho kalabot sa unang gabii ni Guo.
Matod ni Bustinera nga 45 square meters ang gidak-on sa maong selda ug puros bar ang bungbong ug dunay 10 ka triple deck ang sulod diin anaa sa 2nd level ang pwesto ni Guo ug adunay tupad niini nga lima o unom ka piniriso.
Matod ni Bustinera, si Guo adunay problema sa pagkatulog aron mahiangay. Ang higdaanan kay plywood ra sab nga giputos sa linoleum aron dili makasulod ang mga kuto sa higdaanan.
Layo kini sa iyang detention room sa kustodiya sa Philippine National Police (PNP) diin duna siyay kaugalingong lawak ug banyo ug naghigda sa single bed nga dunay foam.
Matod ni Bustinera, magpabilin si Guo sa Pasig City Jail Female Dormitory hangtod nga adunay mando sa korte nga ibalik siya sa kustodiya sa PNP.
Samtang, mahinumdoman nga sa unang adlaw ni Guo kagahapon sa BJMP, pipila sa iyang mga kahimanan ang nasakmit.
Kini tungod kay ang yellow nga sinina, hygiene kits ug jogging pants sa kanhi mayor giingong gitugotan lang sa maong prisohan.
Matod ni Bustinera, ang mga nasakmit nga butang iuli sa iyang abogado ug ang uban ipauli kung adunay mobisita kaniya.
