Nakaabante na sa quarterfinals sa Bad Homburg Open doubles tournament ang tambalan nila Alex Eala ug Venus Williams human nilang mapildi ang pares nila Catherine Harrison ug Alexandra Osborne sa Round of 16 pinaagi sa iskor nga 6-3, 6-4.
Maayo ang sinugdanan sa duwa alang kang Eala ug Williams diin dali silang nakalamang og 4-0 sa unang set, nga nakahatag kanila og dakong bentaha batok sa ilang mga kaatbang.
Sa ikaduhang set, misulay pag-gukod ang ilang mga kontra apan nakapakita gihapon og lig-on nga depensa ug maayong koordinasyon ang Eala-Williams tandem hangtod nga ilang naselyohan ang kadaugan.
Si Williams mismo ang mitapos sa duwa pinaagi sa usa ka malampusong serve.
Sa quarterfinals, atubangon sa duha ang ikaduhang seeded pair nga sila Tereza Mihalikova ug Olivia Nicholls. Padayon usab ang pagpangandam ni Eala alang sa umaabot nga Wimbledon Championships bisan pa man sa iyang sayong pagpanamilit sa singles event sa maong torneyo.
Samtang si Williams, nga 46 anyos na, nagpadayon usab sa iyang preparasyon alang sa Wimbledon doubles competition diin gilauman nga moapil usab ang iyang igsoong si Serena Williams.
