Napakyas ang Filipina tennis star nga si Alexandra “Alex” Eala sa pag-abante ngadto sa semifinals sa Pan Pacific Open human mapildi batok kang Diana Shnaider sa Russia sa quarterfinals kagahapong adlawa sa Japan.
Ang duwa natapos sa iskor nga 2-6, 7-6(5), 6-4 pabor kang Shnaider human sa tulo ka set nga engkwentro. Nakuha ni Eala ang unang set, apan nakabawi si Shnaider sa ikaduhang set pinaagi sa usa ka tiebreak, sa wala pa niya hingpit nga nasiguro ang kadaugan sa mahukmanong ikatulo nga set.
Atol sa ikatulo nga set, nakasinati si Eala og problema sa iyang wala nga tiil, hinungdan nga mihangyo siya og medical timeout samtang nag-una si Shnaider. Bisan pa sa mga paningkamot sa Filipina nga makabawi, nagpabilin ang bentaha ni Shnaider, kinsa sa katapusan nakakuha sa kadaugan ug sa usa ka luna sa semifinals. Atubangon ni Shnaider si Mia Pohankova sa semifinals, human gipildi sa naulahi si Naomi Osaka sa quarterfinals pinaagi sa iskor nga 7-6(3), 6-3.
