Nisaka sa bag-ong career-high ranking ang Filipina tennis star nga si Alex Eala, human mosaka og duha ka puwesto ngadto sa World No. 18 sa pinakabag-ong WTA rankings.
Nakapundok si Eala og 2,281 ranking points, human sa iyang maayong kampanya sa North American hard-court swing.
Nahimo usab siyang pinakataas og ranggo nga babayeng tennis player gikan sa Southeast Asia sa kasaysayan sa WTA, nga milabaw sa kanhing rekord nga World No. 19 nga gihuptan nila Yayuk Basuki sa Indonesia ug Tamarine Tanasugarn sa Thailand.
Una nang nakab-ot ni Eala ang World No. 20 human niya makuha ang iyang unang WTA Tour singles title sa Mubadala DC Open sa Washington, D.C.
Sa maong tournament, napildi niya si World No. 3 Jessica Pegula sa finals aron mahimong unang Filipina nga nakadaog og WTA Tour-level singles title.
Human niini, nakaabot siya sa Round of 16 sa Canadian Open ug Round of 32 sa Cincinnati Open, nga nakatabang sa iyang pagsaka sa rankings.
Karon, ipunting ni Eala ang iyang atensyon sa US Open, ang katapusang Grand Slam tournament sa tuig, diin gilauman siyang mahimong seeded player sa women’s singles draw
