Gipildi ni Filipina tennis star nga si Alex Eala ang Ukrainian player nga si Oleksandra Oliynykova, 6-1, 6-4, sa ilang second-round matchup nga gihimo sa Louis Armstrong Stadium sa Flushing Meadows sayo sa buntag ning adlaw nga Biyernes, oras sa Pilipinas.
Nakuha usab ni Eala ang usa ka matang sa panimalos batok kang Oliynykova, nga nakapildi kaniya sa ilang unang panag-atubang sa Strasbourg pinaagi sa tulo ka sets.
Sa ilang duwa sa New York, kusog dayon ang pagsugod sa 21-anyos nga si Eala human niya makuha ang unang set, 6-1. Sa ikaduhang set, misukol pag-ayo ang world No. 46 nga si Oliynykova ug nakapatas sa 3-all human niya mabreak ang serve ni Eala.
Apan nagpabiling kalmado si Eala ug nakakuha pag-usab ang bentaha human siya makakuha og break. Gipaduol pa niya sa kadaugan ang iyang kaugalingon human niya makuha ang service game nga walay gihatag nga puntos sa kontra, alang sa 5-3 nga bentaha.
Bisan nakahold serve si Oliynykova aron mapaduol sa 5-4, wala na magpapugong si Eala ug iyang gitapos ang dula pinaagi sa pag-hold sa iyang serve, 6-4.
Sa iyang sunod nga dula, atubangon ni Eala ang modaog sa second-round matchup tali sa iyang suod nga higala nga si Iva Jovic ug Francesca Jones.
