Gipukan sa Pinay tennis sensation nga si Alex Eala ang reigning Olympic champion nga si Zheng Qinwen sa China pinaagi sa kulba-hinam nga tulo ka set, 4-6, 6-4, 6-1, sa round of 32 sa Mubadala DC Open didto sa Washington, D.C..
Misulod si Zheng isip paborito apan mipakita sa iyang “never-say-die spirit” si Eala bisan pa man nabiyaan og set ug break sa ikaduhang set.
Human makuha ang momentum aron itabla ang dula, hingpit nga gipaluhod sa 19-anyos nga Filipina ang kanhi World No. 4 pinaagi sa sunod-sunod nga nindot nga baseline rallies sa pinal nga set.
Tungod niini, malampuson niyang nabalusan ang iyang kanhi tormentor ug opisyal nga nakuha ang iyang ticket pasulod sa round of 16.
Sunod nga makatigi ni Eala sa torneyo ang defending champion ug Canadian-Filipino tennis star nga si Leylah Fernandez.
