Nagpadayon ang impresibong dagan sa Filipina tennis sensation nga si Alex Eala human niyang mapildi ang World No. 8 nga si Elina Svitolina sa iskor nga 6-3 ug 6-4 sa quarterfinals sa Berlin Tennis Open.
Pinaagi sa maong kadaugan, nakaabante si Eala sa semifinals diin iyang atubangon ang Czech tennis player nga Linda Noskova.
Sa unang set, dali nga nakalamang si Eala og 3-0 antes nakapuntos si Svitolina. Bisan og nakaduol pa ang Ukrainian star sa 4-3, napildi gihapon siya ni Eala nga midaug sa sunod duha ka duwa aron makuha ang unang set.
Sa ikaduhang set, nagtinagurhaay ang duha ka magdudula sa sinugdanan apan nakalamang si Eala og 5-2. Misulay pagbalik si Svitolina pinaagi sa pagdaog sa duha ka sunod nga games apan nagpabiling lig-on si Eala ug iyang giselyohan ang kadaugan.
Miingon si Eala nga dakong dungog alang kaniya ang pag-atubang kang Svitolina nga iyang gihangaan sukad pa sa iyang pagkabata.
Ikaduha kini nga sunod-sunod nga kadaugan ni Eala batok sa usa ka Top 10 player sa Berlin ug ikaunom na niya nga kadaugan kontra sa mga Top 10 players sa WTA Tour. Kini usab ang laing dakong kalampusan sa Filipina star nga nagpadayon sa pagpasigarbo sa Pilipinas sa internasyonal nga entablado sa tennis.
