Opisyal nga anaa sa listahan sa 2025 Wimbledon Championship sa London si Pinay tennis star Alex Eala.
Kini na ang ikaduhang grand slam main draw appearance ni Eala ning tuiga.
Makita sa listahan sa Womens’ Tennis Association ang pangalan sa ranked 77 nga si Eala nga sigurado ang pagdula sa pinaka-prestisyoso nga grass court tournament sa kalibotan.
Ang official draw kung asa masayran ang makalaban ni Eala ang mahitabo karong Hunyo 27, tulo ka adlaw una ang pagsugod sa ikatulong grand slam tournament ning tuiga.
Ang mga players nga malakip ang makasulod isip seeded sa main draw, wild card o pinaagi sa qualifying.
Kahinumdoman nga kaniadtong Mayo, unang misabak si Eala sa French Open nga kini ang labing una niya nga grand slam kung asa napakyas siya sa first round.
