Napildi ang Alas Pilipinas Men’s sa ilang unang dula kontra South Korea sa Men’s Volleyball Pool D sa 2026 Asian Games human mapildi sa tulo ka sets, 16-25, 25-27, 22-25.
Nanglisod ang Pilipinas sa unang set tungod sa mga ‘service errors’ nga gipahimuslan sa South Korea aron makuha ang 25-16 nga kadaugan.
Mas nahimong dikit ang second set, diin nakauna og upat ka puntos ang Pilipinas, apan nabawi kini sa Korea sa ulahing bahin sa set.
Nakalabaw ang Korea sa 21-20 human sa 3-0 run ug gibutang sa alanganin ang Pilipinas.
Nakigtabla ang Alas Pilipinas hangtod sa kataposan, apan nakuha sa Korea ang set sa iskor nga 27-25.
Sa third set, misukol pag-usab ang Pilipinas apan wala na mapugngi ang South Korea nga sirad-an ang dula sa iskor nga 25-22.
Nanguna sa opensa sa Pilipinas si Alas Pilipinas Men’s team captain Bryan Bagunas nga nakapuntos og 15, gisundan nila Joshua Magalamaan nga adunay 13 points, Leo Ordiales nga adunay 11 points ug Marck Espejo nga adunay 7 points.
Kauban sa Pilipinas ug South Korea sa Pool D ang China ug Chinese Taipei.
