Nagpabilin ang Armed Forces of the Philippines (AFP) sa ilang baruganan nga dili mosurender bisan usa ka pulgada sa teritoryo sa Pilipinas human sa pamahayag ni Sen. Rodante Marcoleta nga daw nagsugyot sa pagsurender sa Kalayaan Island Group (KIG) tungod sa tensyon sa China.
Sumala sa tigpamaba sa AFP para sa West Philippines Sea nga si Rear Admiral Roy Vincent Trinidad, ang mandato sa Armed Forces of the Philippines mao ang pagpanalipod sa soberanya ug integridad sa nasud.
Ang teritoryo nga gisaad sa AFP nga panalipdan naglakip sa Kalayaan Island Group ug Bajo de Masinloc, nga giangkon usab sa ubang mga nasud.
Si Rear Adm. Trinidad miingon nga ang AFP wala gyud magduha-duha sa pagtuman niini nga mandato ug napamatud-an na nato kini sa kasaysayan.
