Gipasalig sa pamunoan sa Armed Forces of the Philippines nga padayon ang ilang pagpatrolya sa West Philippine Sea aron ipanghingusog ang soberanya sa nasud.
Matod sa Armed Forces of the Philippines, nakigtambayayong sila sa maong lakang sa ubang dagkong ahensya sa gobyerno.
Si AFP Spokesperson, Colonel Francel Margareth Padilla, niingon nga atol sa ilang pagpatrolya sa nasangpit nga kadagatan, kapin sa 11,000 ka mga maritime vessels ang ilang nakita sa miaging bulan.
Gikan sa gibana-banaang gidaghanon dul-an sa 2,000 niini ang domestic vessels samtang kapin sa 9,200 ang foreign vessels.
Gawas niini, siyam ka People’s Liberation Army Navy ug tulo ka barko sa China Coast Guard ang nasigpatan usab sa Bajo de Masinloc.
Pito ka mga barko sa PLA Navy ug usa ka CCG vessel ang nakita usab sa Ayungin Shoal area.
Ang AFP nitaho nga walay Chinese vessels ang nabantayan nga nagpabilin sa Sabina Shoal o Escoda Shoal sa nasangpit nga rehiyon.
