Gikompirma ni Armed Forces of the Philippines (AFP) Chief of Staff Gen. Romeo S. Brawner Jr. nga gibabagan ang pwersa sa Chinese Coast Guard sa pagduol sa pinakadakong barko sa Pilipinas, ang BRP Sierra Madre.
Kini human makita ang presensya sa pipila ka mga barko sa People’s Republic of China sa Ayungin Shoal, nga sakop gihapon sa kadagatan sa Pilipinas.
Sa pipila ka mga video nga gipaambit sa Armed Forces, makita ang duha ka rubber boat gikan sa Pilipinas nga nagpugong sa pagduol sa usa ka gamay nga Chinese fishing vessel paingon sa direksiyon sa BRP Sierra Madre.
Matod ni Brawner, ang posibleng masakyan sa CCG personnel sa BRP Sierra Madre mahimo usab nga itandi sa ilang pagtunob sa teritoryo sa nasod.
Luyo niini, gihatagan og gibug-aton ni Brawner nga ubos sa Rules of Engagement (ROE), ilang gituyo ang pagpatuman sa tukmang pwersa aron mapugngan ang China sa pagduol sa barko sa Pilipinas.
Matod niya nga kung makita sa mga litrato ug video, ang mga Chinese naval vessels, bisan ang ilang rubber boats, aduna nay mga armas.
Hinungdan nga gipaniguro sa heneral nga andam ang Armadong Kusog sa bisan unsang posibleng mahitabo ug nipasalig nga dili sila moatras sa bisan unsang posibilidad ilabi na sulod sa teritoryo nga sakop sa exclusive economic zone sa nasod.
Sa laing bahin, si Department of National Defense (DND) Secretary Gilberto Teodoro Jr., nagbilin ug mapintas nga mensahe ngadto sa habig sa China nga padayong nagpaambit sa propaganda ug walay kamatouran nga impormasyon sa mga social media platform kalabot sa nagpadayong tensyon sa West Philippine Sea.
Siya miingon nga walay usa nga mituo sa ilang mga pamahayag ug ang China kanunay adunay isulti mahitungod sa ilang mga lakang ug multi-lateral nga mga kalihokan, bisan pa nga kini dili usa ka pagpangandam sa pagbatok sa ilang presensya sa WPS.
Dili angayan nga pangagpas sa kalihim ang rason sa padayong pagsaka sa gidaghanon sa mga barko sa China sa kadagatan sa nasod ug alang sa kalihim, ang iyang trabaho mao ang pagpanghimakak ug pagklaro sa mga pamahayag sa nahisgutang nasod kalabot sa ilang mga kalihokan sa WPS.
Bisan pa sa nagkadaghang presensiya sa mga barko sa China sulod sa maong kadagatan, wala pa makita sa AFP ang panginahanglan nga dugangan ang pwersa sa kasundalohan sa WPS apan giklaro usab niini nga gitun-an na kini sa ilang tropa.
Dugang pa nga gipasalig sa Armadong Kusog nga ang ilang mga tropa sa WPS padayong magmabinantayon ug andam sa bisan unsang mahitabo ug gipasalig nga padayon nilang ipaambit ang kamatuoran ug suklan ang mga bakak nga pamahayag sa China kalabot sa tinuod nga panghitabo sa maong kadagatan.
