Gibarugan ni Armed Forces of the Philippines (AFP) Chief of Staff Gen. Romeo S. Brawner Jr. nga wala’y nahitabo nga kudeta sa sulod sa ilang hanay, ilabi na sa iyang pagdumalahan.
Matud ni Brawner, nagpabiling matinud-anon sa konstitusyon ang ilang chain of command ug dili gayud niya tugotan nga adunay pag-alsa o kagubot nga mahitabo sulod sa AFP.
Gipaklaro ni Brawner ang kamahinungdanon sa propesyonalismo sa mga sundalo ug ang padayong reporma ug disiplina nga ilang gi-implementar sa ilang organisasyon.
Gidugang pa sa heneral nga puno pa gihapon ang iyang pagsalig sa iyang mga sakop, nga anaa matud pay bililhon nga integridad,
patriotismo, ug propesyonalismo.
Samtang,mipasidaan si Brawner batok sa mga nagpakatag og sayop nga impormasyon nga mahimong hinungdan sa kagubot ug makadaot sa mga institusyon nga gikatakdang moprotektar sa katawhan.
Mihangyo ang heneral sa publiko nga mag-amping sa paghisgot sa mga sensitibong isyu, ilabi na kon kini may kalabotan sa nasyonal nga seguridad.
