GENERAL SANTOS CITY – Seryoso ang administrasyon ni General Santos City Mayor Lorelie Pacquiao nga dakpon ang mga kolorum nga traysikol nga gapasamada sa syudad.
Kini human sa wala mahinayon nga pagpanakop sa mga dili rehistrado nga traysikol sa nakalabay nga semana gumikan sa konsiderasyon aron mahatagan ug higayon ang nahisgutang sektor nga makatigum ug salapi nga gamitom sa pag apply ug prangkisa.
Kahinumduman niadtong Marso sais gianunsyo sa Public Safety Office nga magpatuman ug “no franchise, no travel policy” sa mga traysikol nga nag operate isip public transportation hinungdan nga daghan usab ang wala mubihaye sa kahadlok nga masikop.
Gani daghan ang midayeg sa Mayor nga may kaisog sa pagresolba sa kapin dekada nga problema sa transportasyon sa syudad.
Kahinumduman nga gamay lamang ang nagrenew sa ilang prangkisa sa Public Safety Office luyo nga giablihan sa syudad ang mukapin napulo ka libo ka prangkisa.
