Gikumpirma sa sikat nga dancer ug actress nga si AC Bonifacio nga single na siya karon human sa ilang panagbulag sa aktor nga si Harvey Bautista.
Sa iyang pagbisita sa “Painfully Human Podcast” ni Edward Barber niadtong Marso 20, nahisgutan ni AC ang iyang status sa kinabuhi.
Atol sa ilang panag-istorya, giangkon ni AC nga dili sayon ang iyang giagian.
Gibutyag ni Edward, kinsa nagsilbing “kuya” ug suod nga higala ni AC, nga emosyonal kaayo ang nahimong desisyon sa dalaga.
Miingon si Edward nga mapasigarbohon siya sa pagkahamtong nga gipakita ni AC sa pagdumala sa iyang mga desisyon, bisan pa man sa kasakit nga iyang gibati.
Kahinumduman nga niadtong Abril sa miaging tuig, nahimong headlines ang relasyon sa duha sa dihang gidepensahan ni Harvey si AC batok sa mga bashers samtang anaa pa ang dalaga sulod sa usa ka reality show.
Bisan pa man sa panagbulag, nagpadayon ang kalampusan ni AC sa iyang career. Bag-ohay lang, nahimong viral ang balita nga gi-follow siya sa global K-pop star nga si Jungkook sa TikTok.
Samtang, wala pa mopagawas og dugang detalye si AC mahitungod sa rason sa ilang panagbulag ni Harvey.
