GENERAL SANTOS CITY – Uyon si Atty. Rey Cartojano, Co-Anchor sa programang DURALEX-SEDLEX, kung hingpit mahimo nga legal ang diborsyo sa nasud.
Matod niini nga gibasehan sa maong sugyot-balaudnon ang datos kung asa daghan nang mga magtiayon karon ang wala na nag-uban sulod sa pipila ka mga tuig.
Nagatuo si Atty. Cartojano nga panahon na aron mahatagan ug tiyansa ang mga magtiayon nga talikdan ang ilang gipanumpaan kung irreconcilable na ug kung gusto na nila magsugod ug bag-ong pamilya kauban ang bag-ong partner.
Gipaklaro niini nga sa diborsyo, dili makumpromiso ang sustento sa mga bata.
Dako usab kini nga benipisyo sa mga magtiayon aron dili na sila mugasto ug dakong salapi kung itandi sa annulment procedures.
Gihingusgan usab sa abogado nga kinahanglan lamang nga open minded ang mga simbahan ilabi na ang mga politiko kabahin sa hisgutanang diborsyo.
Nagpahimangno usab si Atty. Cartojano sa mga musulod sa kaminyoon nga dili kini dali.
Kinahanglan balansehon ang tanan nga sitwasyon, mangandam ug pilion ug tarong ang ilang kauban sa kinabuhi.
