Plano sa mga awtoridad nga pasakaan og kasong kriminal si Atty. Elmer Galicia, ang abogado nga nagnotaryo sa counter-affidavit ni kanhi Bamban Mayor Alice Guo kung mapamatud-an nga namakak kini sumala sa tigpamaba sa PAOCC nga si Winston Casio.
Matod niya, ilang gisusi kon tinuod ba ang pangangkon ni Galicia nga personal nga nakigtagbo si Guo kaniya aron magpanotaryo niadtong Agosto 14 sa dakbayan sa San Jose Del Monte, Bulacan.
Matod sa opisyal sa PAOCC, nagpaabot na lang sila sa dugang verified information gikan sa ubang ahensya alang sa posibleng pagpasaka og kaso batok kang Atty. Galicia.
Kon aduna na silay igong basehanan, gilayon nilang ipasaka ang kaso.
Sa laing bahin, gibutyag usab sa opisyal sa PAOCC nga ang gitaktak nga mayor sa Bamban nga si Alice Leal Guo gikatakdang pasakaan og dugang kaso sa umaabot nga mga semana diin matod niya lakip sa ipasaka nga kaso mao ang tax evasion, qualified trafficking in person ug napamatud-an nga guilty sa Office of the Ombudsman tungod sa grave misconduct tungod sa operasyon sa illegal POGO hub sa lungsod nga iyang kanhi gidumalahan.
