GENERAL SANTOS CITY – Adunay maayo og dili maayong resulta sa Maharlika Investment Fund.
Kini ang gibutyag ni Atty. Teodoro Sales, usa ka inilang abogado sa syudad.
Matud niini, maayo ang tumong sa gobyerno sa gipasa nga sugyot balaudnon apan nahibulong kini nga paspas ang pagpasa sa House of Representatives sa pinal nga pagbasa sa House Bill 6608, nga magmugna og sovereign wealth fund measure.
Gibutyag ni Atty. Sales nga nabalaka usab kini sa pagpadagan sa pondo kay basin mahulog sa pagka-bangkarote.
Kung maaprobahan man isip hingpit nga balaud, wala nay mahimo ang katawhan kun dili ang hugot nga magbantay sa paggamit sa pondo nga gikan sa mga dagkong bangko sa gobyerno.
Nagtuo usab kini nga posibleng magamit sa pulitika gumikan sila ang gagunit og gakontrol sa pondo.
Nasayran nga kapin sa 200 ka magbabalaud sa House of Representatives ang mipabor sa Maharlika Investment Fund, samtang silang House Deputy Minority Leader Mujiv Hataman sa Basilan og Camarines Sur Representative Gabby Bordado ang mikontra.
