-- ADVERTISEMENT --

POLOMOLOK- Nasakmit sa kapulisan ang 380 ka ream sa gituohang kontrabandong sigarilyo nga nagkantidad og ₱325,158.40 ug nadakpan ang tulo ka suspek atol sa checkpoint operation sa Barangay Silway 7, Polomolok, South Cotabato, pasado alas 10:20 sa buntag niadtong Nobyembre 15, 2026.

Gipahigayon ang operasyon sa hiniusang pwersa sa RID 12 Special Tracker Team Bravo ug Charlie, kauban ang Polomolok Municipal Police Station, diin nadakpan ang mga suspek nga giila lamang sa alyas nga Manny, 29 anyos, Gard, 26, ug Bat, 26 anyos, nga puro mga residente sa Malabang, Lanao del Sur.

Narekober ang mga sigarilyo nga New Berlin sulod sa puti nga Suzuki multicab. Gawas sa walay tax stamp, wala usab kiniy graphic health warning labels nga gikinahanglan sa balaod.

Gidala sa Polomolok MPS ang sakyanan ug mga nasakmit nga sigarilyo alang sa hustong dokumentasyon ug disposisyon, samtang giandam na ang mga kaso batok sa tulo ka nadakpan tungod sa paglapas sa may kalabotang mga balaod.

Matud ni Police Regional Office 12 Regional Director PBGEN Alan B. Manibog, padayon nilang palig-onon ang kampanya batok sa smuggling aron mapanalipdan ang ekonomiya ug masiguro ang pagsunod sa balaod, lakip ang pagpugong sa pagsulod ug pagkatag sa mga ilegal nga produkto sa mga komunidad.

-- ADVERTISEMENT --