Ipahigayon karong adlawa, Nobyembre 14, 2026, ang gipaabot nga Dugong Bombo 2026 sa Bombo Radyo Philippines, kauban ang Bombo Radyo Philippines Foundation, Inc. ug Philippine Red Cross. Kini ang pinakadakong usa ka adlaw nga boluntaryong blood donation drive sa nasud nga dungan nga gipahigayon sa 25 key areas nationwide.
Mas nahimong espesyal ang kalihokan karong tuiga tungod kay nagsaulog ang Bombo Radyo Philippines sa ika-60 nga anibersaryo niini sa natad sa pagsibya, lakip na ang kapin 20 ka tuig nga padayon nga serbisyo publiko ug boluntaryong pagtabang pinaagi sa Dugong Bombo.
Sulod sa kapin duha ka dekada, nahimong simbolo ang Dugong Bombo sa lig-on nga pagbarog sa Bombo Radyo Philippines sa pagserbisyo sa komunidad ug pagtabang sa katawhan. Gikan sa usa ka inisyatiba nga nagtumong sa pagdasig sa boluntaryong pagdonar og dugo, nahimo kini nga kalihokan sa tibuok nasud nga naghiusa sa liboan ka mga Pilipino nga adunay usa ka tumong—ang pagluwas sa kinabuhi sa uban.
Nagkahiusa pag-usab ang nagkalain-laing ahensya sa gobyerno, civic organizations, relihiyosong grupo, mga eskwelahan, uniformed personnel, pribadong kompanya ug mga indibidwal aron moapil sa maong kalihokan. Nagpakita kini sa diwa sa boluntaryong pagtabang ug responsibilidad sa matag usa nga motabang sa mga nanginahanglan.
Sulod sa kapin 20 ka tuig, nahimong kasaligan nga tinubdan sa suplay sa dugo ang Dugong Bombo alang sa mga blood bank, ospital ug emergency response units. Pinaagi niini, liboan na ka yunit sa dugo ang natigom nga nakatabang sa pagluwas sa daghang kinabuhi.
Dili lamang sa tinuig nga bloodletting activity kutob ang maong programa, tungod kay padayon usab kini nga nagdasig sa mga komunidad sa pag-apil sa boluntaryong pagdonar og dugo ug paghimo sa pagtabang sa isigkatawo nga usa ka padayon nga responsibilidad.
Uban sa temang “A Little Pain, A Life to Gain,” gipahinumdoman ang matag Pilipino nga bisan gamay lamang nga kasakit ug pipila ka gutlo ang gikinahanglan sa pagdonar og dugo, dako na kini nga tabang nga mahimong makaluwas sa kinabuhi sa usa ka tawo nga nanginahanglan niini.
Bisan pa sa pag-uswag sa siyensya ug teknolohiya sa medisina, wala gihapoy kapuli ang dugo sa tawo kon gikinahanglan kini alang sa mga pasyente.
Samtang gipahigayon ang Dugong Bombo 2026 sa 25 key cities nationwide ang Bombo Radyo Philippines, uban sa Bombo Radyo Philippines Foundation, Inc. ug sa Philippine Red Cross, nagpamatuod pag-usab sa ilang pasalig sa pagserbisyo sa publiko, boluntaryong pagserbisyo, pagpalig-on sa komunidad, ug pagtukod sa nasud.
Nagpasalamat usab ang Bombo Radyo Philippines sa tanang stakeholders, sponsors, partner organizations, volunteers ug blood donors nga nahimong kabahin sa kalampusan sa Dugong Bombo 2026 ug nakatampo aron mahimong makahuluganon nga adlaw sa pagpakabana, pagkamanggihatagon ug pagtabang sa isigkatawo.
