Magpadayon ang imbestigasyon batok sa mga opisyal sa Department of Education (DepEd) ug Office of the Vice President (OVP) nga giingong nalambigit sa sayop nga paggamit sa confidential funds ug bribery, bisan gibawi na sa prosecution ang tulo ka artikulo sa impeachment trial ni Bise Presidente Sara Duterte.
Gipasalig kini ni lead prosecutor ug Batangas Representative Gerville “Jinky Bitrics” Luistro, kinsa miingon nga gisugdan na sa Office of the Ombudsman sukad pa niadtong 2024 ang imbestigasyon sa mga alegasyon batok sa mga opisyal sa duha ka ahensya.
Matud ni Luistro, wala kini magpasabot nga nahunong na ang imbestigasyon tungod lamang sa pag-atras sa mga artikulo nga may kalabotan sa confidential funds, bribery ug grave threats.
Andam usab ang prosecution nga itugyan sa Ombudsman ang mga dokumento ug ebidensya nga ilang natigom atol sa mga pagdungog sa Kamara ug impeachment proceedings.
Posible usab nga mosangpot kini sa kasong kriminal o sibil, depende sa resulta sa imbestigasyon.
Samtang, gilain nga gidungog sa Quezon City Regional Trial Court ang kaso nga grave threats may kalabotan sa mga pahayag ni Duterte niadtong Nobyembre 2024 batok kang Presidente Ferdinand Marcos Jr. ug uban pang opisyal sa gobyerno.
