Nanawagan si House prosecution spokesperson ug Lanao del Sur Representative Zia Alonto Adiong sa Senate impeachment court nga patas ug makanunayon nga ipatuman ang sub judice rule aron malikayan ang mga pahayag nga posibleng makaapekto sa impeachment proceedings batok kang Bise Presidente Sara Duterte.
Gihimo ni Adiong ang panawagan human padayon nga gikuwestiyon ni Paolo Panelo, tigpamaba sa Bise Presidente, ang proseso sa impeachment trial ug ang pagbawi sa prosekusyon sa tulo ka artikulo sa impeachment.
Sumala kang Adiong, ang mga tigpamaba sa duha ka habig kinahanglan usab nga mosunod sa maong lagda.
Giinsistir usab niya nga adunay gahum ang Senado, isip impeachment court, sa paghimo sa kaugalingong mga lagda sa proseso subay sa Konstitusyon.
Gidepensahan usab ni Adiong ang desisyon sa prosekusyon nga bawion ang mga artikulo nga may kalabotan sa confidential funds, bribery ug grave threats, nga nag-ingon nga dili usik ang paggamit sa pondo sa publiko kon tumong niini ang pagpapanubag sa mga opisyal sa gobyerno.
Sa pagkakaron, Artikulo II na lamang, nga may kalabotan sa unexplained wealth ug uban pang alegasyon, ang gipadayon sa prosekusyon human dawaton sa Senado ang pagbawi sa tulo ka artikulo.
Gibutyag ni Adiong nga kinahanglan klaro ug makanunayon ang pagpatuman sa mga lagda aron mapreserbar ang integridad sa impeachment court ug ang pagsalig sa publiko sa proseso.
