Ang Philippine Drug Enforcement Agency (PDEA) RO12, pinaagi sa Sarangani–General Santos Provincial Office, nibungkag sa usa ka drug den ug nasikop ang tulo ka tawo atol sa operasyon nga gihimo niadtong Oktubre 21, 2026, sa Lacap Subdivision, Purok Lower Malakas, Barangay San Isidro, General Santos City. Ang operasyon niresulta sa pagkasakmit sa gituohang shabu nga gibanabana nga mobalor sa ₱106,760.
Ang operasyon gihimo uban sa koordinasyon sa General Santos City Police Office Police Station 4.
Ang tulo ka mga tawo nga nasikop giila sa mga alyas nga “Jr,” 37, kinsa gitumbok nga nagmintinar sa drug den; “Dondon,” 26, kinsa gikatahong mibisita sa maong lugar; ug “Jak” 26, empleyado sa drug den.
Narekober sa mga otoridad ang pito ka heat-sealed plastic sachet nga adunay sulod nga white crystalline substance nga gituohang shabu, usa ka genuine ₱1,000 bill, duha ka cellphone, ug nagkadaiyang drug paraphernalia.
Ang mga dinakpan mag-atubang og kasong kalapasan sa Article II sa Republic Act No. 9165 o Comprehensive Dangerous Drugs Act of 2002.
Ang PDEA RO12 nagpabiling pasalig nga makigtambayayong sa ilang mga kauban sa pagpatuman sa balaod aron mabungkag ang gidudahang mga drug den, masumpo ang pagbaligya sa ilegal nga droga, ug tabangan ang mga komunidad nga luwas gikan sa peligrosong droga.
