Miabot sa labing menos 153 ka tawo ang namatay human giatake sa drone ang usa ka merkado sa Abyei, usa ka teritoryong gikalalisan sa Sudan ug South Sudan.
Sumala sa usa ka opisyal sa administrasyon sa Abyei, nahitabo ang pag-atake niadtong Lunes sa Amiet Market, sa amihanang bahin sa lungsod sa Abyei, ug giakusahan niini ang militar sa Sudan nga maoy responsable sa pagpamomba.
Matod sa Ministry of Foreign Affairs and International Cooperation sa South Sudan, daghang bahin sa merkado ang naigo sa mga drone, hinungdan nga gipatawag niini ang embahador sa Sudan ug gihangyo ang silingang nasud nga undangan ang mga aksiyon nga makapameligro sa kinabuhi ug kabtangan sa mga sibilyan.
Samtang, usa ka opisyal sa militar sa Sudan ang miingon nga ang ilang target mao ang mga tanker sa gasolina nga gikan sa South Sudan ug padulong unta sa paramilitar nga grupo nga Rapid Support Forces o RSF, ug giangkon nga mga miyembro sa maong grupo ug mga tigpayuhot og gasolina ang nangamatay.
Gikondena usab sa United Nations ang mga pag-atake sa drone duol sa Amiet Market ug Todach, nga miresulta sa pagkamatay sa daghang sibilyan, lakip ang mga babaye ug kabataan, ug pagkasamad sa daghan pang uban.
