Gipasakaan og kaso ang tulo ka Pilipino nga mga green card holder sa California, Estados Unidos, uban sa laing 25 ka langyaw tungod sa giingong ilegal nga pagparehistro isip botante ug pagbotar sa eleksiyon sa nasud.
Gikilala sa US Department of Justice ang mga Pilipino nga sila si Giezell Viduya Adawag, 41 anyos, taga-Vacaville; Jose Probitsado Amaro, 51 anyos, taga-National City; ug Pamele Arbues Line, 56 anyos, taga-Escondido.
Sumala sa US DOJ, ang tanang 28 ka akusado mga legal nga permanenteng residente o green card holder, apan dili mga lungsoranon sa Amerika ug busa dili kwalipikadong mobotar sa mga eleksiyon niini.
Giingong nagparehistro si Adawag isip botante sa adlaw mismo sa kinatibuk-ang eleksiyon niadtong Nobyembre 2024, diin gideklarar usab kuno niya nga usa siyang US citizen ug mibotar sa maong eleksiyon.
Samtang si Amaro ug Line giakusahan usab nga sayop nga nagdeklarar nga mga lungsoranon sila sa Amerika aron makarehistro ug makabotar, ug giingong naghatag usab og sayop nga impormasyon kabahin sa ilang pagkalungsoranon atol sa ilang naturalization proceedings.
Kabahin ang mga kaso sa “Operation Protect the Vote,” usa ka hiniusang kampanya sa upat ka opisina sa US Attorney sa California batok sa ilegal nga pagparehistro ug pagbotar, diin 11 sa 28 ka akusado ang gidakop niadtong Oktubre 19.
Gipatin-aw sa US DOJ nga mga alegasyon pa lamang ang mga kaso ug giisip nga inosente ang tanang akusado hangtod mapamatud-an ang ilang sala lapas sa makataronganong pagduhaduha sa korte.
