Gipadayag sa usa ka ahente sa National Bureau of Investigation o NBI nga wala sila makapakita og lig-on nga koneksyon tali sa mga kontraktor ug mga inhenyero sa Department of Public Works and Highways o DPWH nga giingong gisugo sa paghatod og kickback ngadto kang Senador Jinggoy Estrada kalabot sa mga proyekto sa flood control.
Matod ni NBI Agent Atty. Ivan Samson atol sa iyang testimonya sa Sandiganbayan, wala usab sila makapakita og klaro nga money trail nga igo aron mapalig-on ang kaso batok sa senador.
Gipadayag kini ni Samson sa unang adlaw sa bail hearing ni Estrada ug sa iyang mga kaubang akusado nga mga inhenyero sa DPWH nga nag-atubang og mga kasong plunder.
Bisan pa niini, miinsistir ang ahente sa NBI nga igo ang kinatibuk-ang ebidensya sa ilang imbestigasyon aron irekomendar ang pagpasaka sa kaso. Apan, gisupak kini sa mga abogado sa depensa, nga nangatarongan nga wala si Samson og personal nga kahibalo sa mga giingong panghitabo.
Gitugotan gihapon sa Sandiganbayan si Samson nga motestigo bahin sa proseso sa imbestigasyon, samtang gikatakdang magpadayon ang mga hearing hangtod Nobyembre 12. Gilauman usab nga motambong sa husay sa Oktubre 27 ang kanhing DPWH Secretary Manuel Bonoan.
