GENSAN- Gimandoan sa Police Regional Office -12 ang General Santos City Police Office kon GSCPO nga ilhon ang mga indibidwal nga nagdumala ug nag-organisar sa ilegal nga drag racing sa Barangay Katangawan ning dakbayan.
Kini human sa insidente niadtong miaging semana diin usa ka partisipante sa drag racing ang mihimo og “Superman stunt” apan nabangga sa usa ka traysikol, hinungdan nga adunay mga pasahero nga nadamay.
Matod ni GSCPO City Director Police Colonel Ariel B. Acala, gilayon niyang gipatawag ang mga station commander, kauban ang Traffic Enforcement Unit ug Mobile Patrol Unit, aron hisgotan ang mga lakang batok sa maong kalihokan.
Gimandoan usab niya ang mga may kalabotang yunit nga hugot nga bantayan ug pugngan ang mga kabatan-onang nalambigit sa drag racing sa siyudad.
Dugang pa ni Acala nga lakip sa ilang prayoridad ang pag-ila sa mga nagdumala ug nag-organisar sa maong lumba aron mapugngan ang pagbalik sa susamang insidente ug malikayan ang peligro sa mga partisipante ug ubang mga naggamit sa dalan.
