Gipasalig sa House Prosecution Panel ang ilang kaandam sa pagpadayon pag-usab sa impeachment trial batok kang Vice President Sara Duterte sa Nobyembre 9.
Sa pagkakaron, miingon ang panel nga nangandam na sila alang sa cross-examination o pagpangutana sa mga testigong ipresentar sa kampo ni Bise Presidente Sara Duterte.
Matod ni Lead Prosecutor ug Representative Gerville Luistro, bisan wala pa makuha ang opisyal nga listahan sa mga testigong ipresentar sa depensa, gisugdan na sa panel ang pagpangandam ug pagtuon sa posibleng mga punto ug argumento sa pikas kampo.
Gikatakdang ipadayon ang mga sunod nga pagdungog sa Nobyembre 9 hangtod 13, 19 hangtod 20, ug 23.
Sa pagkakaron, ang nahibiling kaso nakasentro na lamang sa giingong dili mapatin-aw nga bahandi ni Duterte, diin lakip sa gisusi sa prosekusyon ang mga rekord sa bangko, tax returns, Statement of Assets, Liabilities and Net Worth o SALN, mga polisiya sa insurance ug mga pamuhunan.
Kinahanglan usab nga isumite sa depensa ang listahan sa ilang mga testigo lima ka adlaw sa dili pa ang ilang pagpresentar aron makapangandam ang prosekusyon sa mga pangutana ug makasusi sa mga may kalabotang ebidensya.
Tungod sa naunang pag-withdraw sa tulo ka artikulo sa impeachment complaint, gilauman nga mas mapamubo ang proseso sa impeachment trial batok sa bise presidente.
