Nagpagawas ang Bureau of Internal Revenue o BIR og bag-ong patakaran aron mas patas nga mabahin ang gasto sa paghatag sa 20 porsyentong diskwento sa mga senior citizen sa pagpalit og mga tambal ug uban pang panginahanglanon.
Ubos sa Revenue Regulations No. 007-2026, dili na lamang ang mga botika ang mopas-an sa gasto sa maong diskwento, kondili apil na usab ang mga kompanyang naghimo sa tambal, mga distributor ug wholesaler.
Matod sa BIR, magdepende sa kasabutan sa matag partido ang bahin sa gasto nga ilang pas-anon.
Ang matag kompanya o retailer mahimo lamang nga moangkon og tax deduction base sa aktuwal nga kantidad sa gasto nga ilang gibayran.
Gikinahanglan usab nga adunay sinulat ug dokumentadong kasabutan ang mga partido bahin sa pagbahin sa gasto, ug kinahanglan nga maghatag sila og kopya niini ngadto sa Department of Health o DOH.
Sumala sa ahensya, tumong sa bag-ong patakaran nga mas patas nga maapod-apod ang pinansyal nga responsibilidad sa paghatag sa senior citizen discount sa tibuok supply chain sa mga tambal.
