GENSAN- Nagpahimangno ang Police Regional Office-12 kon PRO-12 sa publiko sa mga angay nga pag-amping aron masiguro ang luwas ug malinawon nga paghandom sa kalag-kalag.
Pinaagi sa kampanyang “Ligtas Undas 2026,” giawhag sa kapulisan ang publiko nga siguruhon nga nakasirado ug nakakandado ang mga pultahan ug bintana sa balay sa dili pa mobiya, ug susihon nga walay kandilang nagasiga, nakasaksak nga mga gamit sa kuryente, abri nga gas stove ug gripo nga nag-agas.
Giawhag usab sa kapulisan ang mga mobisita sa sementeryo nga magdala og igo nga pagkaon ug tubig, payong o panalipod batok sa init ug ulan, ug bantayan pag-ayo ang mga bata aron dili mawala. Gisultihan usab ang publiko nga likayan ang pagdala og hait nga mga armas, gamit sa sugal, dagkong speaker, ilimnong makahubog ug mga baligya sulod sa sementeryo.
Dugang pa sa kapulisan, kinahanglan usab nga mahibal-an sa publiko ang nahimutangan sa First Aid Station ug PNP Assistance Desk aron dali silang makapangayo og tabang kon adunay emerhensya.
Alang sa mga mobiyahe sakay sa ilang kaugalingong sakyanan, giawhag sila nga kanunayng i-lock ang mga pultahan, iparada kini sa luwas ug hayag nga lugar, ug dili magbilin og mga bililhong butang sulod sa sakyanan. Gipahinumdoman usab ang mga motorista nga likayan ang paghunong sa ngitngit ug hilit nga mga dapit aron malikayan ang pagpangawat ug uban pang krimen.
Tumong sa PRO-12 nga mapugngan ang mga disgrasya, sunog ug krimen aron masiguro ang kahapsay ug kaluwasan sa publiko atol sa pagsaulog sa kalag-kalag karong tuiga.
