Higanteng ‘inflatable pumpkin’ sa North Carolina, miligid sa tunga sa dalan human mapalid sa hangin

Gipalid sa kusog nga hangin ug miligid sa dalan ang usa ka dako nga ‘inflatable pumpkin’ nga dekorasyon sa usa ka umahan sa North Carolina, Estados Unidos.

Sumala sa Phillips Farms of Cary sa ilang post sa Instagram, natanggal ang mga higot nga nagkupot sa higante nga kalabasa niadtong Domingo ug miligid sa kasikbit nga dalan.

Kabahin kini sa mga dekorasyon alang sa tinuig nga kalihokan sa umahan nga gitawag og ‘Pumpkinfest’.

Natapos ang pagligid sa higanteng kalabasa human miaksyon ang usa ka drayber sa Uber ug uban pang mga tawo aron mapahunong kini.

Gibutyag sa umahan nga luwas nang nauli sa hustong lugar ang ‘inflatable pumpkin’ ug nahimong bahin na usab sa dekorasyon sa ‘Pumpkinfest’.