Dad-on sa Filipina singer nga si Carmelle Collado.ang tinggog sa tradisyonal nga mga instrumento sa Pilipinas nga kulintang ug kubing sa iyang pagrepresentar sa nasud sa Eurovision Song Contest Asia 2026 nga ipahigayon sa Bangkok, Thailand sa Nobyembre 14.
Gamiton ni Carmelle ang kantang “Sobra-Sobra” nga gisulat nila Mat Olavides ug Nica del Rosario, mga kompositor nga nalambigit sa paghimo sa mga sikat nga awit sa BINI ug ni Sarah Geronimo.
Gisagol sa maong kanta ang tradisyonal nga tingog sa Pilipinas ug impluwensiya sa Latin nga musika aron ipakita ang nagkalainlaing impluwensiya sa musikang Pilipino.
Matod ni Olavides, ang kanta nagdala og mensahe bahin sa pagsalig sa kaugalingon, pag-ila sa kaugalingong bili ug dili pagtugot nga ang ubang tawo maoy magbuot sa imong pagkatawo.
Nakuha ni Carmelle ang oportunidad nga morepresentar sa Pilipinas human niya mapildi ang siyam ka laing kontestant sa Philippine Selection Night niadtong Agosto 30.
Makigkompetensiya siya sa mga representante sa Bangladesh, Bhutan, Cambodia, Laos, Malaysia, Mongolia, Nepal, South Korea, Thailand ug Vietnam.
