32 ka bata, patay human mahugno ang atop sa ilang eskwelahan sa amihanang Pakistan

Patay ang 32 ka bata human mahugno ang atop sa ilang eskwelahan sa amihanang Pakistan.

Gituohang walay hunong nga pag-ulan ang hinungdan sa pagkahugno sa atop sa Al Khair Public School sa siyudad sa Peshawar.

Ang mga biktima nag-edad og unom hangtod 14 anyos, samtang lakip usab sa mga namatay ang usa ka 25-anyos nga babaye.

Adunay pipila ka mga estudyante nga na-trap sulod sa nahugno nga building apan dali ra usab silang natabangan ug nakagawas pinaagi sa mga tawo nga didto sa lugar.

Nasa 50 ka bata usab ang nasamdan sa maong insidente.

Samtang, gidakop sa mga otoridad ang tag-iya sa eskwelahan samtang nagpadayon ang imbestigasyon sa maong insidente.