GENSAN- Nakab-ot sa unang batch sa medical students sa Mindanao State University-General Santos City College of Medicine ang 100 percent passing rate sa October 2026 Physician Licensure Examination o PLE.
Sa pahibalo sa kolehiyo, malampusong nakapasar sa licensure examination ang tanang examinees gikan sa ilang pioneer batch, nga nagtimaan sa unang higayon nga miapil ang MSU-GSC College of Medicine sa physician licensure examination.
Gipahigayon ang eksaminasyon niadtong Oktubre 3 hangtod 4 ug Oktubre 10 hangtod 11, 2026.
Mas taas usab kini kon itandi sa nasudnong passing rate nga 93.66%, sumala sa gipatik nga pahibalo sa kolehiyo.
Gipasidunggan sa MSU-GSC College of Medicine ang mga bag-ong lisensyadong doktor, lakip na ang ilang mga pamilya, magtutudlo ug mga mentor nga nahimong kabahin sa ilang paningkamot aron makab-ot ang maong kalampusan.
Alang sa kolehiyo, dili lamang kini kalampusan sa unang batch sa mga medical students, kondili usa usab ka dakong lakang sa pagtukod sa maayong tradisyon ug pagpataas sa kalidad sa edukasyong medikal sa umaabot nga mga henerasyon.
Ang maong resulta nagtimaan sa pagsugod sa bag-ong kapitulo sa MSU-GSC College of Medicine, diin ang unang batch sa mga nag-graduate nahimong mga lisensyadong doktor ug naghatag og dakong garbo sa ilang institusyon.
