Visayas grid ipaubos sa yellow alert karong adlawa, Oktubre 15, gikan sa alas 5:00 sa hapon hangtod sa alas 6:00 sa gabii, tungod sa kakulang sa magamit nga suplay sa kuryente.
Matod sa National Grid Corporation of the Philippines (NGCP), gideklarar ang maong alerto tungod kay ang pipila ka dagkong planta sa kuryente nga naggamit og karbon partikular ang PEDC Unit 3 ug KSPC Unit 1 nga wala naglihok.
Naapektuhan usab ang suplay tungod sa limitado nga kuryente nga gikuha gikan sa Mindanao grid, bunga sa wala damha nga pagkapawong sa FDC Unit 3, ingon man ang gikatakda nga maintenance alang sa GNPK Unit 4 ug TSI Unit 2.
Base sa datos sa NGCP, ang Visayas grid adunay kapasidad nga 2,557 megawatts, samtang ang gipaabot nga kinatas-ang panginahanglan (peak demand) anaa sa 2,479 megawatts.
Tungod sa pagkapawong sa mga planta ug sa mga pasilidad nga naglihok sa mas ubos nga kapasidad, anaa sa kinatibuk-an nga 645.6 megawatts nga kapasidad ang dili magamit sa grid.
Ang yellow alert ideklarar kung ang “operating margin” o sobra nga kapasidad dili igo aron matubag ang gikinahanglan nga reserba sa transmission grid, kung adunay kalit nga pagkabalda sa sistema.
