GENSAN- Natapos na karong adlawa, Oktubre 14, ang libreng ‘cataract screening’ ug ‘eye consultation’ nga gipahigayon sa Knights of Columbus Council 4639 sa General Santos City, isip kabahin sa selebrasyon sa Columbus Day.
Gisugdan ang maong kalihokan niadtong Oktubre 13 sa clubhouse sa konseho nga nahimutang sa Bula-Lagao Road.
Matod ni Rudy Catapang sa Knights of Columbus, gipahigayon ang maong programa pinaagi sa pakigtambayayong sa Borough LASIK Center, kauban ang mga konseho sa ‘Diocese of Marbel East’ ug West, aron mahatagan og libreng pagsusi sa mata ang mga senior citizen ug uban pang benepisyaryo.
Gibanabanang 95 ka indibidwal ang nakabenepisyo sa maong kalihokan, diin giuna ang mga senior citizen, apan giapil usab ang mga dili senior citizen ug mga miyembro sa Knights of Columbus nga posibleng kandidato alang sa operasyon sa mata sa Davao.
Dugang pa, mitampo usab ang City Health Office ug ang Bula Rural Health Unit pinaagi sa libreng blood sugar screening, uban sa mga boluntaryo sa DMI Holy Love Circle ug sa medical team nga mitabang sa paghatag sa serbisyo.
Gipasabot ni Catapang nga screening ug konsultasyon lamang sa mata ang gihimo ug wala pa’y gitakdang iskedyul alang sa operasyon sa mga benepisyaryo nga posibleng adunay katarata.
Samtang, makigkoordinar pa ang organisasyon sa ilang ‘medical partner’ alang sa sunod nga ‘eye screening’ ug ipahibalo kini sa publiko sa higayon nga matino na ang iskedyul.
