GENSAN- Mikunhod na ngadto sa 500 hangtod 600 ka mga unit ang nagserbisyo sa General Santos City gikan sa miaging mokabat sa 800 ka modernized ug traditional public utility vehicles tungod sa nagpadayon nga krisis, sumala kang Orly Sabelita, chairman sa GenSan Transport Cooperative.
Matud ni Sabelita, usa na sa pito ka transport cooperatives sa siyudad ang miabot sa pagka-‘bankcrupt’, hinungdan nga mihunong kini sa pagbiyahe ug wala na makabayad sa utang sa mga ‘modernized unit’.
Bisan pa niini, ang laing unom ka kooperatiba naningkamot gihapon nga makapadayon sa pagserbisyo sa mga pasahero.
Gilaoman ni Sabelita nga makatabang ang interbensiyon sa ikatulong partido aron mabalik sa operasyon ang rota sa kooperatibang nagkalisod.
Nanawagan usab kini sa Land Transportation Franchising and Regulatory Board kon LTFRB-Regional Office nga hatagan og pagtagad ang kahimtang sa sektor sa transportasyon sa siyudad.
