GENSAN- Giawhag sa City Health Office sa General Santos City ang mga ginikanan nga tugotan ang ilang mga anak nga makadawat sa girekomendar nga bakuna ubos sa ”School-Based Immunization” o ”Bakuna Eskwela 2026”.
Sa gipagawas nga pahimangno sa buhatan, ubos gihapon ang natalang ”vaccination coverage” base sa dashboard kagahapon, Oktubre 9, 2026.
Nakapahigayon lamang og 4.92 percent nga coverage ang ‘Measles-Rubella ug Tetanus-Diphtheria” nga bakuna alang sa Grade 1, samtang 4.07 percent sa Grade 7.
Nakaabot lamang usab sa 6.34 percent ang unang ‘dose’ sa ‘Human Papillomavirus vaccine ” alang sa mga babayeng estudyante sa Grade 4, samtang 0.17 percent pa lamang ang ikaduhang dose.
Gipasidan-an sa City Health Office nga ang ubos nga ‘vaccination coverage’ nagpasabot nga daghang bata ang posibleng wala pa mapanalipdi batok sa mga sakit nga malikayan pinaagi sa bakuna. Kon mokaylap ang maong mga sakit sa mga eskwelahan ug komunidad, posibleng modaghan ang mga bata nga magkinahanglan og medikal nga pag-atiman.
Busa, giawhag ang mga ginikanan nga pirmahan ang ‘consent form’, tugotan ang ilang mga anak nga kwalipikado nga mabakunahan, ug makig-alayon sa eskwelahan ug mga health worker aron masiguro nga makompleto ang gikinahanglang mga ‘dose’.
Dugang pa sa buhatan nga ang bakuna dili lamang proteksyon alang sa kaugalingong anak, kondili makatabang usab sa pagpanalipod sa iyang mga classmate, pamilya ug sa tibuok komunidad.
