Naglaum ang Malacañang nga magpabiling himsog si kanhi Presidente Rodrigo Duterte aron maatubang ang mga akusasyon batok kaniya ug mapaambit ang iyang nahibaloan bahin sa giingong mga krimen nga may kalabotan sa drug war sa iyang administrasyon.
Sumala kang Palace Press Officer ug Communications Undersecretary Claire Castro, gusto sa mga Pilipino nga molambo ang kahimsog ni Duterte aron maatubang niya ang mga alegasyon batok kaniya sa International Criminal Court (ICC).
Matod pa ni Castro, posibleng moangkon si Duterte sa mga pagdungog bahin sa giingong mga plano sa pagpatay nga gihimo alang sa kampanya batok sa ilegal nga droga.
Kini human ideklarar sa ICC Trial Chamber III nga angayan si Duterte nga moatubang sa pagdungog, human gisalikway ang argumento sa iyang depensa nga ang iyang kahimtang sa panglawas, ilabi na ang iyang memorya ug abilidad sa panghunahuna, nakaapekto sa iyang kapasidad nga makaapil sa husay.
Nakatakdang sugdan sa Nobyembre 30 ang pagdungog may kalabotan sa mga kasong ‘crimes against humanity’ nga gipasaka batok sa kanhi presidente.
