GENSAN- Gitay-og sa magnitude 5.6 nga aftershock sa Balut Island, Davao Occidental alas-4:07 sa hapon, Oktubre 8.
Sumala sa PHIVOLCS, may giladmon kini nga 26 kilometro ug ang epicenter niini natala 28 kilometro sa amihanan-kasadpan sa Balut Island sa Municipality of Sarangani, Davao Occidental.
Intensity V ang natala sa Kiamba, Sarangani ug General Santos City, samtang Intensity IV sa pipila ka bahin sa Sarangani ug South Cotabato.
Nabati usab ang pag-uyog sa pipila ka bahin sa Cotabato, Sultan Kudarat, Davao Region ug Zamboanga City.
Sumala sa PHIVOLCS, usa kini ka aftershock sa magnitude 7.8 nga offshore Sarangani earthquake niadtong Hunyo ug magnitude 6.5 nga offshore Davao Occidental earthquake.
Samtang, migawas ang mga mall goers ug empleyado sa usa ka mall sa General Santos City human mabati ang kusog nga pag-uyog yuta.
Gisuspinde usab ang trabaho sa tanang government offices sa General Santos City alang sa structural inspection ug safety assessment sa mga building.
Gisuspinde usab ang klase sa tanang lebel sa mga pampubliko ug pribadong eskwelahan hangtod sa sunod nga pahibalo.
Gipahimangnoan ang publiko nga magpabiling kalmado, mag-alerto sa posibleng mga aftershock ug mosunod sa opisyal nga mga pahibalo.
