Kumpiyansa ang kampo ni VP Sara Duterte sa ilang kaandam nga atubangon ang uban pang imbestigasyon, gawas sa nagpadayong impeachment trial sa Senado.
Matod sa spokesperson sa bise presidente nga si Atty. Paolo Panelo, andam ang legal team ni VP Sara nga atubangon ang uban pang imbestigasyon nga posibleng ipahigayon sa bisan unsang ‘investigating body’ batok kaniya.
Lakip niini ang posibilidad sa imbestigasyon nga maggikan sa mga isyung migawas sa impeachment trial, sama sa mga isyu sa kwarta.
Matod ni Atty. Panelo, nagpabilin ang baruganan ug posisyon ni VP Sara nga wala siyay nahimong sayop sulod sa iyang karera sa ‘public service’, gikan sa iyang pagserbisyo sa Davao isip ‘local chief executive’ hangtod karon nga siya na ang bise presidente sa Pilipinas.
Matod pa niya, “welcome” ang tanang imbestigasyon nga posibleng ipahigayon.
Kahinumdoman nga kaniadto adunay mga nagpasaka og ‘plunder’ ug ‘criminal complaints’ batok sa bise presidente tungod sa mga isyu sa kwarta nga giingong nalambigit siya. Ang una niini gisumite sa mga ‘civil society leaders’, ‘church representatives’ ug ‘academics’ nga naglangkob sa mga reklamo sa ‘plunder’, ‘bribery’, ‘malversation’ ug graft.
Gisundan kini sa ubang plunder ug criminal complaints nga gisumite ni kanhi Senador Antonio Trillanes IV.
