Tulo ka tawo ang nasamdan human giatake sa mga Houthi ang duha ka airport sa Saudi Arabia duol sa utlanan sa Yemen.
Sumala sa Saudi Civil Aviation Authority, naigo ang King Abdullah bin Abdulaziz Airport sa Jazan ug ang Najran Airport niadtong Lunes sa gabii.
Gawas sa mga samad, nakasinati usab og kadaot ang pipila ka pasilidad tungod sa mga pag-atake. Miingon ang awtoridad nga gidala sa ospital ang mga nasamdan ug gilayon nga giatiman sa mga espesyalistang grupo ang sitwasyon.
Gikondena sa Gulf Cooperation Council ang pag-atake sa mga airport ug civilian facilities, nga ilang giingong delikado nga pagpalala sa tensyon.
Nahimo ang maong pag-atake taliwala sa nagkagrabeng panagsangka sa Yemen diin ang mga pwersang suportado sa Saudi Arabia nakig-away sa Houthi rebels.
Samtang, giingon sa Saudi-led coalition nga ilang gilaglag ang usa ka ballistic missile launch platform sa Sanaa ug usa ka storage facility sa Saada nga adunay 20 ka ballistic missiles.
