GENSAN- Posibleng nahimong porma sa pamulitika ang pagpalawig sa termino sa mga barangay ug SK officials, ilabina kung walay klarong makatarunganong rason ang pagpostpone sa piniliay.
Kini ang punto ni Gensan City Councilor Franklin “Jeng” Gacal, kinsa miingon nga mahimong adunay pagsabot tali sa mga ‘incumbent officials’ ug mga politiko nga mipabor sa pag-extend sa ilang termino.
Matud ni Gacal, mahimong adunay panglantaw nga kung mapalawig ang termino sa mga opisyal, mahimo silang mobati og “utang kabubut-on” ngadto sa mga politiko nga misuporta sa maong extension.
Sumala kaniya, mahimong magresulta kini sa pagsuporta sa mga ‘incumbent officials’ sa kandidatura sa maong mga politiko sa umaabot nga eleksyon.
Giingon ni Gacal nga ang padayon nga paglingkod sa mga kapitan, barangay kagawad ug SK officials pinaagi sa legislative action dili parehas sa paglingkod pinaagi sa piniliay, diin ang katawhan mismo ang mopili sa ilang mga lider.
Dugang niya, importante nga ang katungod sa mga botante sa pagpili sa ilang mga lider respetuhon pinaagi sa regular ug tukmang pagpahigayon sa eleksyon.
