Gatusan ka eskwelahan sa France ang gisirhan human misamot ang protesta sa mga estudyante nga miresulta sa panag-away tali kanila ug sa kapolisan.
Sumala sa Ministry of National Education, labing menos 400 sa kapin 3,700 ka high school sa tibuok nasud ang wala magbukas niadtong Biyernes, samtang 560 pa ang nagtaho og protesta o pagkaputol sa ilang operasyon.
Nagsugod ang protesta sa mga high school sa Paris area niadtong miaging semana ug mikaylap na sa ubang bahin sa France. Gipangayo sa mga estudyante ang mas gamay nga gidaghanon sa estudyante kada klase, dugang mga magtutudlo ug mas maayong kahimtang sa pagkat-on.
Apil sa mga insidente ang pagbabag sa mga entrada sa eskwelahan, pagsunog og mga butang sa kadalanan ug panagsangka sa kapolisan. Nasunog usab ang entrada sa duha ka high school sa Paris.
Matod sa Justice Minister nga si Gerald Darmanin, mokabat na sa 2,000 ka mga tawo ang nadakpan, diin kadaghanan mga menor de edad.
Gipahimangnoan usab ni Education Minister Edouard Geffray ang mga ginikanan nga pahilayon ang ilang mga anak sa mga protesta, samtang ang gobyerno nag-atubang usab og pressure tungod sa protesta sa public sector batok sa budget plans niini.
