Nagpaabot na ang mga konsumidor sa pagpagawas sa Department of Trade and Industry o DTI sa updated nga price guide alang sa mga produktong kasagarang pang-Noche Buena karong panahon sa Pasko.
Lakip sa mga produkto nga kasagarang ginamonitor sa DTI ang ham, queso de bola, cheese, pasta, spaghetti sauce, mayonnaise, sandwich spread, all-purpose cream ug fruit cocktail.
Sa miaging tuig, 256 ka holiday food items ang gilakip sa price guide sa DTI, diin 129 niini nagpabilin ang presyo, samtang 95 ka produkto ang nakarekord og gamay nga pagsaka sa presyo tungod sa pagtaas sa gasto sa ingredients, packaging ug labor.
Aduna usab unom ka produkto nga nakasinati og price rollback o pagkunhod sa presyo.
Gipahinumdoman sa DTI ang mga konsumidor nga dili lamang ang presyo ang ilang tan-awon sa pagpamalit sa mga pang-Noche Buena, kundili apil ang timbang, expiration date, kalidad ug kompletong impormasyon nga makita sa label.
Giawhag usab ang publiko nga itandi ang presyo sa nagkalainlaing tindahan ug pilion ang mga produkto nga uyon sa ilang budget apan sigurado ang kalidad ug kaluwasan.
