Dili moubos sa 33 ka tawo ang namatay samtang 36 ang nasamdan human nagpahigayon og airstrike ang militar sa Myanmar duol sa usa ka merkado sa Kyauktaw, Rakhine State niadtong Lunes, Setyembre 28.
Sumala sa pahayag sa Arakan Army, duha ka bomba ang gilabay sa usa ka fighter jet pasado sa udto duol sa merkado diin apil sa mga namatay ang mga tindero, mamalitay, ug mga residente sa palibot.
Gikumpirma usab sa ‘rescue official’ nga si Wai Hun Aung ang gidaghanon sa mga biktima ug miingon nga ang maong lugar usa sa mga nag-unang ‘wholesale center’ nga kanunayng adtoan sa mga negosyante gikan sa tibuok rehiyon.
Nagpasidaan ang Arakan Army nga posible pang mosaka ang gidaghanon sa mga namatay samtang nagpadayon ang ‘retrieval’ ug ‘rescue operations’ sa nahugno nga merkado.
Wala pa magpagawas og opisyal nga pahayag ang militar sa Myanmar kalabot sa insidente, bisan pa man nga kaniadto niini gipadayag nga lehitimong ‘military targets’ lamang ang ilang giatake.
Nagpadayon ang grabeng panagsangka ug kagubot sa Myanmar human sa ‘military coup’ niadtong 2021, diin nakig-away ang militar nga gobyerno batok sa nagkalain-laing armadong grupo lakip na ang Arakan Army.
