Nanawagan ang pipila ka senador sa gobyerno ug sa Philippine Tennis Association o PhilTA nga hatagan og bug-os nga suporta ang Filipino tennis star nga si Alex Eala human niya pilion nga mopasidunggog sa Pilipinas sa 2026 Asian Games sa Nagoya, Japan imbis nga modula sa mandatory WTA 1000 China Open.
Sa manifestation nila ni Senador Erwin Tulfo ug Senador Bong Go sa sesyon sa Senado, gihangyo ni Tulfo ang Philippine Sports Commission o PSC, Philippine Olympic Committee o POC, ug uban pang may kalabotan nga ahensya nga mangita og legal nga paagi aron matabangan si Eala kung ihatag kaniya ang gikatahong $10-million nga multa tungod sa paglaktaw sa torneyo sa Beijing nga nasabay sa iskedyul sa Asian Games.
Gipadayag ni Tulfo nga dili angay ibutang ang atleta sa sitwasyon nga kinahanglan siyang mopili tali sa iyang nasod ug propesyon, samtang iyang gipasalig nga nagbarog ang tibuok nasod sa luyo sa desisyon ni Eala.
Mihangyo usab si Go, nga maoy chairman sa Senate Committee on Sports, sa WTA nga tagdon ang sitwasyon ug hatagan si Eala og ‘exemption’ sa bisan unsang multa o silot tungod kay dili angay silotan ang usa ka atletang mipili sa pagserbisyo alang sa nasod.
Aduna nay commitment si Eala sa national team sukad pa niadtong 2021 ug nagtinguha nga malabwan ang iyang nadag-an nga bronze medal sa women’s singles sa 2022 Asian Games, samtang ang China Open gikatakdang ipahigayon gikan Septiyembre 30 hangtod Oktubre 11, nga nasabay sa tennis competition sa Asian Games gikan Septiyembre 27 hangtod Oktubre 2.
Dugang ni Go, nagpakita ang maong sitwasyon sa panginahanglan alang sa bag-ong mga polisiya ug balaod nga maghatag og prayoridad ug proteksyon sa mga Pilipinong atleta kung tawagon sila aron moserbisyo alang sa national team.
