GIPANAWAGAN ni kanhi Surigao del Norte Representative Ace Barbers ang Department of National Defense, Philippine Navy ug Philippine Coast Guard nga dayon beripikahon ug hugot nga bantayan ang gikatahong presensya sa upat ka barkong pandigma sa China duol sa Hilabaan, Eastern Samar.
Matod ni Barbers, base sa nakuha nga impormasyon, lakip sa mga namataang barko ang duha ka Luyang III-class guided-missile destroyers ug duha ka Jiangkai II-class frigates.
Gipasiugda ni Barbers nga dili angay pasagdan ang presensya sa maong mga barko tungod kay adunay kini mga kapasidad alang sa air defense, long-range strike ug anti-submarine warfare.
Gihangyo niya ang mga awtoridad nga tukion kung asa nahimutang ang maong mga barko, asa kini padulong ug unsa ang ilang gibuhat, lakip na kung nagsunod ba kini sa international law sa ilang operasyon.
Giinsistir ni Barbers nga dili pasabot nga provocation ang pagkamabinantayon.
Matod pa niya, kinahanglan mahibaloan sa Pilipinas ang bisan unsang kalihokan sa mga langyaw nga barkong pandigma nga anaa duol sa teritoryo ug kadagatan sa nasod.
Tungod niini, iyang gibalik-balik ang panawagan alang sa pagtukod og naval installation sa Surigao del Norte ubos sa Enhanced Defense Cooperation Agreement o EDCA aron mapalig-on ang seguridad sa sidlakang bahin sa nasod.
Sa pagkakaron, siyam na ang itinalagang EDCA sites sa Pilipinas.
Lakip niini ang Basa Air Base sa Pampanga; Fort Magsaysay Military Reservation sa Nueva Ecija; Lumbia Airport o Air Base sa Cagayan de Oro; Antonio Bautista Air Base sa Puerto Princesa, Palawan; Benito Ebuen Air Base sa Cebu; Naval Base Camilo Osias sa Sta. Ana, Cagayan; Lal-lo Airport sa Cagayan; Camp Melchor dela Cruz o Aquino sa Gamu, Isabela; ug Balabac Island sa Palawan.
