GENSAN- Dismayado si Atty. Rey Cartojano sa presentasyon sa prosecution team sa ilang mga ebidensya ug testigo alang sa Article 1 sa impeachment trial batok kang Vice President Sara Duterte.
Kini human gipahayag sa prosecution nga hapit na nila mahuman ang ilang presentasyon sa maong Article ug mosunod na ang diskusyon kabahin sa Statement of Assets, Liabilities and Net Worth o SALN.
Matud ni Cartojano, iyang gilauman nga makapresentar ang prosecution og mga independent witness nga direktang makapunting kang Vice President Duterte, ug dili lamang sa mga kalihokan sulod sa Office of the Vice President.
Gipasabot sa abogado nga lahi ang Office of the Vice President sa personal nga kapasidad sa Bise Presidente, bisan pa man og konektado ang maong posisyon ug opisina.
Matud pa niya, kung adunay mga paglapas nga nahimo sa ubang personnel sa Office of the Vice President, mahimo kining mahimong basehan sa laing mga kaso batok sa mga responsable.
Apan kung ang tumong mao ang pag-impeach mismo sa Bise Presidente tungod sa betrayal of public trust o culpable violation of the Constitution, kinahanglan matod pa nga adunay direktang ug positibong ebidensya nga maglambigit mismo kang Vice President Duterte sa mga alegasyon.
Gipahayag ni Cartojano nga sa iyang obserbasyon, kadaghanan sa mga ebidensya nga gipresentar sa prosecution, ilabina ang mga testimonya sa hostile witnesses, circumstantial o dili direktang ebidensya.
Dugang pa niya, importante nga adunay klaro ug direktang pamatuod aron lig-on nga maestablisar ang mga alegasyon batok sa Bise Presidente.
