Nagtinguha ang usa ka lalaki sa South Carolina, Estados Unidos nga makabreak sa Guinness World Record alang sa pinakadaghang koleksyon sa medyas, human nga milapas na sa 2,000 ka pares ang iyang natigom.
Ang residente sa North Augusta nga si Darryl Parker, usa ka retiradong bombero ug paramedic, miingon nga nagsugod ang iyang pagkolekta og medyas human siya nakadawat og usa ka pares isip regalo sa Father’s Day.
Misunod ang dugang mga medyas nga iyang nadawat isip regalo sa iyang mga birthday, anibersaryo ug uban pang okasyon.
Matud ni Parker, namatikdan sa iyang asawa ug mga apo ang kadaghan sa iyang koleksyon ug gisugyot nga sulayan niya ang Guinness World Record.
Ang kasamtangang rekord gihuptan sa retiradong news anchor nga si Jim Donovan, nga nakatigom og 1,531 ka pares nga lahi-lahi nga medyas niadtong 2025.
Apan sumala ni Parker, kapin na sa 2,000 ka pares ang iyang koleksyon ug padayon pa siyang magtigom hangtod sa kataposan sa tuig sa dili pa niya isumite ang mga medyas sa Guinness World Records alang sa opisyal nga pagberipika.
Gipahayag usab ni Parker nga ang mga bag-ong medyas nga madonar sa publiko igahatag niya sa mga lokal nga shelter human niya makab-ot ang maong rekord.
